తెలుగు బ్లాగుల అగ్రిగేటర్లను ఆదుకోండి!

      గౌరవనీయులైన తెలుగు బ్లాగర్లందరికీ శుభాభివందనములు
      ఈరోజు మనకి అంతర్జాలంలో తెలుగు బ్లాగుల అగ్రిగేటర్లు ప్రధానంగా మూడే వున్నాయి. 1.కూడలి,2.మాలిక,3.బ్లాగిల్లు.ఇవి కాకుండా కొంతమంది నాలాంటి ఔత్సాహికులు బ్లాగుప్రపంచం,పూదండ,బ్లాగ్ వేదిక లాంటి అగ్రిగేటర్లను నిర్వహిస్తున్నారు.
     గతంలో అందరి మన్ననలను పొందిన అగ్రిగేటర్ "హారం" పూసలదండలోని ఒక పూసలా అగ్రిగేటర్ల మాలలోంచి విడివడి కనుమరుగయిపోయింది.మొన్నటికి మొన్న దాని నిర్వహణా భారం మోయలేక శ్రీనివాస్ గారు బ్లాగిల్లు ముగించేద్దామనుకుని, తిరిగి తెలుగు బ్లాగుల పట్ల అభిమానం చంపుకోలేక దానిని కష్టనష్టాలకోర్చి నిలబెట్టారు.ఆయనను మనమందరమూ అభినందించాల్సిందే!
    పల్లెప్రపంచం ఓనర్ పల్లా కొండలరావుగారు బ్లాగ్ ప్రపంచం నిర్వహించనని ఇప్పటికే తన బ్లాగు పూర్వకంగా తెలియజేసేసారు. ఇంకా గతంలో ఎంతోమంది ఇప్పటికే ఎన్నో తెలుగు అగ్రిగేటర్లను మూసేసారు.దీనికంతటికీ కారణం ఏమిటి?
    నిజానికి ఈ తెలుగు బ్లాగుల అగ్రిగేటర్లకు ఏవిధమైన ఆదాయవనరులు లేవు ఆఖరికి నెలవారి అయ్యే ఇంటర్ నెట్ బిల్లు కూడా ఈ అగ్రిగేటర్ల వలన రాదు.అయినప్పటికీ తమ వ్యయంతో వీటిని కొనసాగిస్తున్నారు. మరి ఇన్నీ తెలిసిన మనం వారిని పట్టించుకుం టున్నామా? అంటే అదీ లేదు.
    మన బ్లాగులను ఈ అగ్రిగేటర్లు ప్రమోట్ చెయ్యకపోతే అంతర్జాలంలో మన బ్లాగులకు ఉనికేలేదు.ఇది పచ్చి నిజం. ఎందుకంటే ఏ అగ్రిగేటర్లోను నమోదు చేయని నా బ్లాగు ఒకటి ఒకనెలలో నాలుగంటే నాలుగు క్లిక్ లు మాత్రమే వచ్చాయి. తరువాత ఈ అగ్రిగేటర్లలో నమోదు చేయబడిన తరువాత మరు నెలలో 2800 క్లిక్ లు వచ్చి చేరాయి.దీనిని బట్టి మన తెలుగు బ్లాగుల అగ్రిగేటర్ల గొప్పతనం మనకు అర్ధమవుతోంది.
    నిజానికి ఈ అగ్రిగేటర్లు బ్లాగుకు 1సం//కు ఒక 50రూపాయలో,100రూపాయలో ఫీజు పెడితే బాగుంటుందేమో అనిపిస్తోంది. కాని ఏ ఫీజు లేకుండా చాలా సేవ చేస్తున్నాయి.ఇతర రాష్ట్రాల అగ్రిగేటర్లైతే కొంతమొత్తంలో ఫీజులు వసూలు చేస్తున్నాయి.
    ఇంత చేస్తున్న మనం వాటికి ఏమి చేస్తున్నామో చెప్పండి ఏమీ లేదే! ఏవిధంగా వారికి చేయూతనివ్వని మన తెలుగు బ్లాగర్లు కనీసం ఆయా అగ్రిగేటర్ల లోగోలను కూడా మన బ్లాగులకు అతికించడం లేదు.కనీసం వారి అగ్రిగేటర్ లోగోలను బ్లాగుల్లో పెట్టుకున్నా వారికి కొంత ప్రోత్సాహాన్ని, ఉత్సాహాన్ని నిoపినవారమవుతాము.మనం వాటి పట్ల అదీ కూడా చేయకపోతే ఈ అగ్రిగేటర్ల సేవలను ఉచితంగా పొంది వారికి తీరని అన్యాయం చేస్తున్నట్టే!
    ఎంతోమంది సీనియర్ బ్లాగర్లు కూడా వారికి కనీసం ఈ విధమైన సహకారం అందించడం లేదు. ఇది ఎంత దారుణం. దయచేసి ఇప్పటినుండైనా అగ్రిగేటర్లను నిలబెడదాం! వాటి లోగోలను మన బ్లాగులకు అతికించి తెలుగు బ్లాగుల అగ్రిగేటర్లందరికీ సెల్యూట్ చేద్దాం!జైహింద్!!